Nytt år

“Nytt år, nye mogelegheiter” seier me ofte i januar. Tilbakelagt høgtidsstund, blanke ark og så mykje som skulle vore gjort… Sjølv elskar eg uttrykket. Synest det er fylt til randen av energi og håp. Ei verkeleg drivkraft!

Ved ettertanke slår det meg: Desse blanke arka, desse mogelegheitene er me jo faktisk så heldige å ha kvar einaste dag me vaknar opp til ein ny dag. Me treng ikkje vente på nye år for å ta tak i livet, for å gjere noko positivt for dei rundt oss eller bidra til at verda vert litt grønare. Men det er tungt å bryte mønster, gjere nye ting, samarbeide med folk me ikkje kjenner, syne at me ikkje er verdsmeistrar i alt me gjev oss ut på.

Det er lett å kome med grunner til å rettferdiggjere seg. Godt å ha ei orsaking på lager.

Året me har lagt bak oss har gjort inntrykk – både på godt og vondt. Det skakar i grunnvollane når kvardagen vert snudd på hove over natta, og personvern og demokrati vert utfordra. Når det me har teke for gitt ikkje lenger kan reknast med.

Kanskje er det dei små tinga me har sakna mest: Klemmen, møteplassen, nærbutikken, det gode måltidet med vener – og sjølvsagt NATUREN. Men naturen har også vorte redninga for mange i denne tida – både fysisk og psykisk, når me har hatt høve til å oppsøke den: Skogens ro, tindens makt og havet som heilar. Men også den aller næraste naturen har me fått augo opp for: Blomane som helsar oss i hagen, dyrking i balkongkasser, fuglelivet på veg til postkassa. Dette lille som har vorte så stort. Små kunstverk av metanboblar i skøyteisen og mikroskopiske snøkrystallar pryder Instagram som aldri før.

Sanneleg trur eg også me har lært noko viktig dette året, om oss sjølve, om verda rundt oss og at me kan viss me vil. Litt meir audmjuke og med litt meir i bagasjen trur eg me er klare for gjere ein innsats for å ta vare på verdiane våre. Kan hende har me ikkje så mange konkurrentar, mest samarbeidspartnarar.

Gler meg til å møte alle som har lyst til å samarbeide med Miljøsmidjo om berekraftige løysingar i Vestland – anten det er verksemder som vil feie for eiga dør, det offentlege som har lyst til å vere rollemodell, akademia som sår for framtida, frivillig organisasjonar som vil engasjere fotfolket eller du som er berre deg og har ein god ide du vil lufte.