Det Nye og Det gamle

«Det er alltid det sporløse 
som setter de djupeste spor»  

– Hans Børli 

Med det nye året kjem ofte undring – over det som venter, men også over det som har vore og er, i røynda sjølve LIVET. I verdas rikaste land er det lett å kjenne takksemd for gode levekår og sikkerheitsnett me har om det røyner på. Men rikdomen gjer oss også i stand til å leve liv som utbyter naturressursar og sett andre sine liv i fare.   

Forretningsideen til Miljøsmidjo er å nytte ressursane, både naturressursane, men også dei menneskelege ressursane meir effektivt. I kortversjon; bidra til å late at mindre spor. 

Det er spennande å vere på veg – heilt på eigenhand. Men, som Målbedrift i Hardanger og Voss Næringshage får eg god hjelp, både med å få grunnmuren på plass, og ikkje minst inspirasjon. Med kontorplass i Gondolbygget har eg også mange kjekke kollegaer. Det er godt å ha nokon å løyse verdsproblem med i lunsjen – og det viktigaste – kollegaer gjev kjensla av å høyre til! 

Hausten blei nytta til å ferdigstilla Klimasatsprosjektet «Reduksjon av matsvinn i Voss herad». At over ein tredel av all mat i verda vert kasta er eit miljømessig, økonomisk og ikkje minst etisk problem. Skal me nå berekraftmålet til FN om å redusere matsvinn med 50 % innan 2030, må me gå systematisk til verks i heile matsirkelen. Dette inneber samarbeid gjennom heile verdikjeda, frå produksjon av råvarer, via foredling og distribusjon, og heilt fram til forbrukaren. 

Vår uvettige bruk av plast er årsak til alvorleg forureining som skader både menneske, dyr og natur. Produksjon av plast står også for omfattande klimagassutslepp. Voss herad har i lag med Miljøsmidjo laga framlegg til sin fyrste strategi for bruk og handtering av plast. Denne skal bidra til redusert forbruk av plast og mindre plast på avvegar. 

Miljøsmidjo har tatt opp tråden frå Voss herad sitt «Grøn november» og vidareført i «Grøn veka», som motsats til kjøpefesten Black week. Med magert budsjett og mykje frivillig arbeid, vart dette eit vellykka prosjekt takka vere unike samarbeidspartnarar som Kirkens Bymisjon, Voss Utferdslag, Voss Naturvernlag, Voss Sentrum og Voss herad. Draumen er at den Grøne Veka skal vekse seg større til neste år, og at me vert fleire som bidreg til merksemd rundt bruken av lokale ressursar og opplevingar, framfor kjøpt lykke. Miljøsmidjo vil jobbe vidare for at dette vert eit livskraftig, årleg arrangement på Voss.